स्थानीय तहमा व्याप्त उक्त मान्यताकै कारण हरेक व्यक्तिले आफ्नो गच्छे अनुसार (हुने खानेले बोका र नहुनेले कुखुरा) को बलि चढाउँछन्।

विशेषगरी दुलही भित्र्याउँदा बोका र पशुचौपाया किनेर ल्याउँदा कुखुराको बलि दिने चलन छ।

बलिको साथै कुवाडो देवतालाई खिचडी, पुरी रोटी, धजा र घण्टीहरू समेत चढाइन्छ ।

सुत्केरी र महिनावारी भएका महिलाले खोला तर्दैनन्

सुत्केरी र महिनावारी भएका महिलाहरूले भने कवाडी खोला तर्दैनन्।

यस्तो बेला खोला तरे देउता रिसाएर दु:ख दिने डरले सुत्केरी र महिनावारी हुँदा आफूहरूले खोला नतर्ने गरेको कमला पाण्डे जैसी बताउँछिन्।

“खोला नजिक जाँदा केही भइहाल्ने हो कि भनेर शरीर नै जिरिङ्ग हुन्छ,” उनी भन्छिन्। “देउताको असाध्यै डर लाग्ने भएकोले सुत्केरी हुँदा कम्तीमा १२ दिन र महिनावारी हुँदा ५ दिनपछि मात्रै खोला तर्ने गर्छौँ।”

खोला जहाँ तरेपनि बेलीब्रिज नजिक रहेकै थानमा बलि चढाउने र पूजा गर्ने गरिन्छ।

कसैले थाहा नपाएर खोला तरे पनि थाहा हुन बित्तिकै पूजा गरेर बलि चढाउँछन्।

बेलीब्रिज बन्नु अघि उक्त ठाउँमा पहिला घाटबाट मान्छेहरू खोला तर्ने गर्थे।

गाउँबाट कामको सिलसिलामा घरबाहिर जाँदा कुवाडो देउतालाई अनिवार्य सम्झने र फर्केर आएपछि बलि दिएर पूजा गर्ने चलन त्यहाँ छ।