सुर्खेत
सुर्खेत उपत्यका खानेपानी उपभोक्ता संस्थामा कार्यरत कर्मचारीहरु संस्थाका कोषाध्यक्ष रामबहादुर गौतमले चेकमा हस्ताक्षर नगरेका कारण चार महिनादेखि तलव खान नपाएको भन्दै खानेपानी सेवा ठप्प पार्ने चेतावनी दिएका छन् ।
कोषाध्यक्षका कारण मंसिर महिनादेखि मासिक तलब खान नपाएको भन्दै कर्मचारीहरुले फाल्गुन १९ देखि २२ गतेसम्म संस्थामा तालाबन्दी गरी खानेपानी संचालन बाहेकका सम्पुर्ण सेवाहरु बन्द गर्ने बताएका छन् ।
फाल्गुन २३ गतेसम्म पनि समस्या समाधान नभए खानेपानी सेवा समेत ठप्प पार्ने चेतावनी उनीहरुले दिएका छन् ।
सुरुका दिनहरुमा संस्थाको कुनै कारणले गर्दा तलब पाउन ढिलो भएको होला भन्ने सम्झि कामकाज गर्दै आईरहेका थियौं, विज्ञप्तीमार्फत उपभोक्ता र सरोकारवालाको ध्यानाकर्षण गदै उनीहरुले भनेका छन, अव चुप लागेर बस्दैनौ ।
चार–चार महिना सम्म तलब सुबिधा नपाएपछि, कार्यालय प्रमुखसँग मौखिक अनुरोध गर्दा नआतिनुहोस भैहाल्छ भन्ने मौखिक जवाफ पाएको र पछि संस्थाको यही फाल्गुन ६ गते बसेको मुल समितिको बैठकले कर्मचारीको तलब समेत निकासा दिनेगरी निर्णय गरेपनि तलव रकम निकासा गर्न कोषाध्यक्ष गौतमले चेकमा दस्तखत नगरेको जानकारी आफुहरुले पाएको उनीहरुको भनाई छ ।
ट्रेड यूनियनले फाल्गुन ७ गते कार्यालय प्रमुख डम्मरबहादुर गौतमलाई तलब उपलब्ध गराउन र प्रमुख जिल्ला अधिकारीलाई तलब खुवाउने व्यवस्थाका लागि आवश्यक पहल गरिदिन अनुरोध पनि गरेको उनीहरुले बताए ।
फेरी फाल्गुन १६ गते संस्थाका अध्यक्ष र कार्यालय प्रमुख समक्ष कर्मचारीहरुलाई तिनदिन भित्र तलब उपलब्ध गराइदिन अनुरोध गरेपनि अध्यक्ष र कार्यालय प्रमुखले कोषाध्यक्षले चेकमा दस्तखत नगरेका कारण तलव दिन नसकेको मौखिक जानकारी दिएकोले बाध्य भएर संर्घषमा उर्तिनु परेको विज्ञप्तीमा उल्लेख गरिएको छ ।
भोकोपेट कामगर्न सकिदैन्, कर्मचारीहरुको ट्रेड यूनियनका अध्यक्ष गणेशमान खनालले जारी गरेको विज्ञप्तीमा भनिएको छ, आफुहरुको आन्दोलनबाट आम उपभोक्तामा पर्न जाने असरको जिम्मेवारी तलब नखुवाउनेहरु हुनेछन् ।
राराखबर । २०७७, १८ फाल्गुन मंगलवार