सुर्खेत
बरिष्ठ मुटुरोग विशेषज्ञ डा. राजेन्द्र कोजुले प्रदेश अस्पतालको क्याथ ल्याव सेवालाई नियमित प्रयोगमा ल्याउन सके कर्णालीबासीको लागि बरदान हुने बताए ।
हृदयघात भएका विरामीलाई एक घण्टाभित्र एन्जिओग्राम गर्न सके निको पार्न सकिन्छ, उनले भने, कर्णालीका जुनसुकै विकट ठाउँबाट हेलिकप्टरमा हृदयघात भएका मानिसलाई एकघण्टाभित्रै प्रदेश अस्पताल पुर्याउन सकिन्छ । तर अरु ठाउँमा पुर्याउन सकिदैन् । त्यसैले प्रदेश अस्पतालको क्याथल्याब कर्णालीका विरामीको लागि वरदान हो ।
तर प्रदेश अस्पतालमा क्याथल्याब सेवाको लागि आवस्यक उपकरण जडान गरिएपनि दक्ष जनशक्ति नहुँदा सेवालाई नियमित र प्रभावकारी बनाउन कठिनाई भैइरहेको उनको भनाई छ ।
क्याथल्याब स्थापनापछि दोस्रो पटक सेवा दिन प्रदेश अस्पताल सुर्खेत आएका कोजुले क्याथल्याब सेवालाई नियमित गर्न तालिम प्राप्त कम्तिमा पनि ६ जना जनशक्ति चाहिने बताए ।
सामान्यया तालिम प्राप्त दुई जना मुटुरोग विशेषज्ञ, तीन जना नर्सिङ स्टाप र एक जना टेक्निसियन चाहिन्छ, उनले भने, यो जनशक्ति प्रदेश सरकारले व्यवस्था गरे कर्णालीका मुटुरोगीलाई बाहिर जानु पर्दैन ठुलो राहात हुन्छ ।
प्रदेश अस्पताल सुर्खेतमा क्याथल्याब स्थापना गर्न अस्पतालका पूर्व निर्देशक डाक्टर डम्बर खड्काले एकदमै अहंम र महत्वपूर्ण भूमिका निर्वाह गरेका थिए ।
तर उनको पालमा स्थापना भएको यो सेवा आवश्यक जनशक्ति व्यवस्थापनामा प्रदेश सरकारले खासै चासो नदिदा अझै पूर्ण रुपमा संचालनमा ल्याउन सकिएको छैन ।
पूर्व निर्देशक खड्काले कर्णालीबासीको घरआगँनमै भएको सेवालाई नियमित रुपमा संचालन गर्न सवैको उत्तिकै चासो र चिन्ता हुनु पर्नेमा जोड दिए ।
धुलिखेलबाट सेवा दिन प्रदेश अस्पतालमा आएको डाक्टर कोजुको टिमले दुई दिनमा पाँच जना मुटुरोगीको इन्जिओग्राम गरेको जनाएको छ ।
पाँच जना मध्य एकजनाको झन्डै ८० प्रतिशत मुटुको रक्तनली साँघुरिए बन्द हुने अवस्थामा रहेको पाइएकोले उनलाई तत्कालै धुलिखेल अस्पताल बोलाएको छ ।
अहिले प्रदेश अस्पतालमा एकजना मुटुरोग विशेषज्ञ भएपनि उनलाई सहयोग गर्ने अरु जनशक्ति नहुँदा एन्जिओग्राम गर्नको लागि मुटुरोगीहरु बाहिर जान बाध्य छन् ।
तर आवस्यक जनशक्ति नहुँदा अहिले प्रदेश अस्पतालले धुलिखेल अस्पतालसँग सहकार्य गरेर मुटुरोगका विरामीलाई एन्जिओग्रामको सेवा दिदै आइरहेको छ ।
डाक्टर कोजुको टिमले अब तिहार पछि फेरी प्रदेश अस्पतालमा आएर इन्जिओग्रामको सेवा दिने जनाएको छ ।
मुटुको रक्तनली साँघुरिएर बन्द भए मानिसलाई हृदयघात हुने भएकोले नियमित रुपमा मुटुको चेकजाँच गर्न र खानपिनमा विशेषा ध्यान दिन मुटुको कथा किताव समेत लेखेका डाक्टर कोजुले सुझाव दिएका छन् ।
डाक्टर कोजुले आफु र आफ्नो टिम रहरले नभई दुर्गमबासीलाई पनि सेवा दिउ भनेर आएको बताए ।
प्रदेश अस्पतालमा डाक्टर कोजुसहित डाक्टर निशान भट्टराई, स्नेहा पोटे र निलिमा कोजुले सेवा दिएका थिए ।
मुटु रोगको उपचार र निदानमा नेपालले पछिल्लो समय उल्लेखय फड्को मारेपनि अझै यो सेवालाई गाउँगाउँसम्म पुर्याउन जरुरी रहेको छ ।
राराखबर । २०८२, २२ भाद्र आईतवार