विष्णु रावल, जाजरकोट
सुर्खेतस्थित गुर्भाकोट ग्यालरीमा आवद्ध युवाहरुले आफ्नो खाजा खर्च कटाएर बचत गरेको रकमबाट भुकम्प प्रभावित  जाजरकोटका विद्यार्थीलाई कपडा सहयोग गरेका छन् ।
नलगाड –१० रावतगाउँको जनविकास आधारभूत विद्यालयका १४७ जना विद्यार्थीलाई सामाजिक क्षेत्रमा काम गर्दै आइरहेका युवाहरुले विद्यालयमै पुगेर विद्यार्थीहरुलाई पोशाक बाँडेका हुन् ।

सबै विद्यार्थीलाई पुग्ने गरी पहिलो पोशाक पाएको विद्यालयका प्रधानाध्यापकले बताए । उनले संकटको बेला सहयोग गर्ने युवाहरु र सहयोगको लागि पहल र समन्वय गर्ने पत्रकार प्रकाश पन्तप्रति आभार व्यक्त गरे ।

हाम्रो विद्यालयका विद्यार्थीको लागि धेरैलाई आग्रह गरियो तर कतैबाट पनि सहयोग भएन्, उनले भने, अहिले युवाहरुले सहयोग गर्दा धेरै नै खुशी लागेको छ ।

दुर्गम ठाउँका भुकम्प प्रभावित विद्यार्थीलाई सहयोग गर्दा खुशी लागेको युवा समाजसेवी महेन्द्रजंग शाहीले बताए । उनले आफुहरुले दैनिक खाजा खर्च र आफ्ना आवश्यकताहरुलाई सिमित पारेर संकलन गरेको रकमबाट विद्यार्थीलाई सहयोय गरेको उल्लेख गरे ।
बीबीसीमा कार्यरत पत्रकार प्रकाश पन्तले काहीकतैबाट सहयोग नपाएका भुकम्प प्रभावित विद्यार्थीको लागि पाेशाकको लागि पहल र समन्वय गर्न अवसर पाउँदा गर्व महशुस भएको बताए । उनले आगामी दिनहरुमा पनि विद्यार्थीलाई आवश्यक पर्ने सहयोगको लागि पहल गर्ने बताए ।

कार्यक्रममा पत्रकार पन्तले विद्यार्थीको लागि बारम्बार सहयोगको लागि आग्रह गर्ने गाउँका अगुवा गोपे रावत, डिलाराम बोहरा, कमल रावतलगायतप्रति आभार समेत व्यक्त गरेका छन् ।

विद्यालयका प्रधानाध्यापक, शिक्षक विद्यार्थी, अभिभावकका साथै गाउँका अगुवाहरुले कार्यक्रमलाई प्रभावकारी र सहज बनाउन महत्वपूर्ण भुमिका खलेका थिए ।ग्यालरीमा आवद्ध युवा समाजसेवी परमोल पुन, मनोज विक र जिल्ला अस्पताल जाजरकोटमा कार्यरत डा.पवनजंग शाहले विद्यार्थीलाई पोशाक हस्तान्तरण गरेका थिए ।