सुर्खेत
आश्रयविहीनहरुलाई आश्रय दिनको लागि मानव सेवा आश्रमको भवन निर्माण गर्न यही मंसिर २१ देखि २८ गतेसम्म सुर्खेतमा हुने महायज्ञमा करिव पाँच करोड रुपैया संकलन गर्ने लक्ष्य राखिएको छ ।
वीरेन्द्रनगरको खुल्लामञ्चमा हुने महायज्ञबाट ५ करोड रुपैयाँ संकलन हुने अपेक्षा गरिएको महायज्ञ मूल आयोजक समितिले गरेको छ ।
महायज्ञ अयोजक समितिका संयोजक डा. नवराज केसीले सडकमा रहेका मानिसलाई उद्धार गरेर राख्ने मात्र नभई मानव अध्ययन केन्द्र बनाउने लक्ष्य रहेको बताए ।
उनले महायज्ञमा कथा वाचक गुरु र कलाकारले पैँसा नलिने पनि उल्लेख गरे ।
महायज्ञमा भागवत भाष्कर कमलनयन गौतमले कथावाचक गर्ने छन् ।
साथै महायज्ञमा सबै धर्म तथा परम्पराका पण्डित, गुरुहरूको सामुहिक उपस्थिति, राष्ट्रिय तथा स्थानीय कलाकारहरूको प्रस्तुति, नाटक, झाक्री प्रदर्शनजस्ता कार्यक्रम रहेका छन् ।
महायज्ञ अवधिभर बिहान ५ देखि ७ बजेसम्म योगको कार्यक्रम रहेको र उक्त कार्यक्रममा अन्तराष्ट्रिय स्तरका प्रशिक्षकले योग सिकाउने छन् ।
७-९ बजेसम्म प्लस टु तहका विद्यार्थीहरुलाई योग, प्रणायम, ध्यान र मानवता प्रवद्र्धनको महत्व सम्वन्धी प्रशिक्षण दिइने छ ।
९-११ सम्म ८, ९, १० कक्षाका विद्यार्थी, त्यसपछि बेलुका ४ बजेसम्म कथा वाचन र साझ ८ बजेसम्म कलाकारबाट भजनको कार्य हुने छ ।
महायज्ञमा सन्दुक रोइत, चर्चित कलाकार मदनकृष्ण श्रेष्ठ, हरिवंश आचार्यजस्ता व्यक्तिहरुको पनि सहभागीता हुनेछ ।
महायज्ञ आयोजक समितिले ५०० देखि १ करोडसम्मको योगदान गर्नेलाई सम्मान गर्ने जनाएको छ ।
यस्तै एक करोडको योगदान गर्नेको मानवसेवा आश्रमको कम्पाण्डभित्र निर्माण हुने कुनैपनि ब्लकको नामकरणसहित दाताको अर्धकदको शालिक पनि निर्माण गर्ने योजना छ ।
यस्तै ५१ लाख ५१ हजारसम्म योगदान गर्नेलाई आश्रमको सभाकक्षमा शिलालेख गरिने छ ।
३१ लाखसम्म योगदान गर्नेको आश्रमको भान्सा र भोजन कक्षको नामकरण गरी सोही कक्षमा शिलालेख राखिने छ ।

०७५ सालबाट सुर्खेत वीरेन्द्रनगर नगरपालिका-१२ मा आश्रमले भाडाको घरबाट सेवा दिँदै आएको छ ।
भवन निर्माणका लागि कणर्ाली प्रदेश सरकारले चालु आर्थिक वर्षको बजेटमा एक करोड रुपैयाँ विनियोजन गरेको छ ।
मानव सेवा आश्रमले ०८२ सालभित्र नेपाललाई सडक आश्रित मानवमुक्त राष्ट्र घोषणा गर्ने तयारी छ ।
देशभर खुल्ला आकाशमुनी रात बिताउन बाध्य बेसहारा, असहाय तथा जीवन नै जोखिममा रहेका सहयोगापेक्षी सडक मानवहरुको मानवोचित व्यवस्थापन गरिने मानव सेवा आश्रमका संस्थापक रामजी अधिकारीले बताए ।

आश्रमको भवन निर्माणका लागि वीरेन्द्रनगर नगरपालिका-११, स्थीत गंगामाला धार्मिक वन र देउती बज्यै सामुदायिक वन समितिले २९ बिघा जग्गा दिएको छ ।