सुर्खेत- आगामी फागुन २१ गते हुने प्रतिनिधिसभा सदस्यको निर्वाचनका लागि सुर्खेत क्षेत्र नं. २ मा चुनावी सरगर्मी तीव्र बनेको छ।
यसैक्रममा नेपाली कांग्रेसका उम्मेदवार नारायण कुमार कोइरालाले नयाँ पुस्ता अर्थात् ‘जेन्जी’ (Gen Z) मतदाताहरूलाई लक्षित गर्दै आफ्नो विशेष अपिल सार्वजनिक गरेका छन्।
जेन्जी विद्रोह र सुशासनको एजेन्डा
कोइरालाले गत भदौ महिनामा भएको ‘जेन्जी विद्रोह’लाई सम्बोधन गर्दै आफू सुशासन र जवाफदेहिताको पक्षमा रहेको स्पष्ट पारेका छन्।
“म जेन्जी विद्रोहको मर्म र एजेन्डाप्रति पूर्ण जानकार छु,” कोइरालाले भनेका छन्, “सार्वजनिक सम्पत्तिको तोडफोड र आगजनीमा म सहमत नभए पनि यो देशमा परिवर्तन चाहनेहरूको भावनामा मेरो ऐक्यबद्धता छ।”
उनले आफूले सहभागिता जनाएका विभिन्न कार्यक्रमहरूमा युवाहरूको मर्म र एजेन्डालाई बुलन्द रूपमा उठाएको दाबी समेत गरेका छन्।
मुख्य चुनावी प्रतिबद्धताहरू
कोइरालाले युवा पुस्ता र अभिभावकहरूलाई लक्षित गरी बिभिन्न प्रतिवद्धताहरू अघि सारेका छन्:
- भ्रष्टाचार अन्त्य: देशमा व्याप्त भ्रष्टाचारको अन्त्य गरी सुशासन कायम गर्ने।
- अवसरको सिर्जना: आफ्ना छोराछोरीको भविष्य जस्तै मतदाताका सन्तानको भविष्यप्रति पनि चिन्तित रहेको उल्लेख गर्दै आगामी पुस्ता यही देशमा बस्ने वातावरण बनाउने।
- नीतिगत सुधार: क्षेत्रको दीर्घकालीन विकासका लागि आवश्यक नीति, नियम र कानुन निर्माणमा सक्रिय भूमिका खेल्ने।
विरासत जोगाउने चुनौती
तीन दशकदेखि यस क्षेत्रबाट चुनाव लड्दै आएका प्रभावशाली नेता हृदयराम थानीले यसपटक चुनाव नलड्ने घोषणा गरेपछि कांग्रेसले कोइरालालाई मैदानमा उतारेको हो।
थानीका विश्वासपात्र मानिने कोइराला शालीन र बौद्धिक छवि भएका नेताका रूपमा चिनिन्छन्।
सुर्खेत उपत्यका नगर विकास समितिका पूर्व अध्यक्ष समेत रहेका कोइरालाले बुलबुले उद्यान र दोभान पार्क व्यवस्थापनमा खेलेको भूमिकालाई उनको विकासवादी छविका रूपमा लिइएको छ।
यस क्षेत्रमा उनको मुख्य प्रतिस्पर्धा नेकपा (एमाले) का कुलमणि देवकोटासँग हुने देखिएको छ।
राराखबर । २०८२, २७ माघ मंगलवार