सुर्खेत । नेपाल प्रिमियर लिग(एनपिएल) टोली कर्णाली याक्सले विपिनप्रसाद शर्मालाई आइकोनिक प्लेयर्समा छनोट गरेको छ । ट्यालेन्ट हन्टबाट छनोट भएका ५ उत्कृष्ट खेलाडी मध्यबाट मंगलवार विपिनलाई आइकोनिक खेलाडीमा छनोट गरेको टोलीले जनाएको छ ।

कर्णालीले ‘ट्यालेन्ट हन्ट’बाट विपिनसँगै मनिष थापा, निश्चल रावल, राजप्रसाद शाह र अरविन्द घर्तीलाई छानेको थियो । उनीहरुले प्रदेशबाट राष्ट्रिय प्रतियोगिता खेलिसकेका छन् ।

बाँकी ४ खेलाडीलाई पनि विशेष प्रशिक्षणको व्यवस्था गरिएको टिमले जनाएको छ । आइकोनिक खेलाडी बनेसँगै विपिनले एनपिएलको पहिलो संस्करणमा कर्णाली याक्सको प्रतिनिधित्व गर्नेछन् ।

ज्ञानेन्द्र मल्ल प्रशिक्षक रहेको कर्णालीको मार्की खेलाडीमा राष्ट्रिय टिमका अलराउन्डर सोमपाल कामी छन् । कर्णाली याक्सले विदेशी खेलाडीमा भारतीय ओपनर शिखर धवन, वेष्ट इन्डिजका चादविक वाल्टन, पाकिस्तानका अलराउन्डर मोहम्मद हुसैन तलत र हङकङका बाबर हायतलाई टोलीमा अनुबन्ध गराएको छ ।

नेपाल क्रिकेट संघ (क्यान) को आयोजनामा एनपिएपल मंसिर १५ देखि पुस ६ सम्म हुँदैछ ।