सुर्खेत । कर्णाली प्रदेशका मुख्यमन्त्री राजकुमार शर्माले अन्ततः  राजीनामा दिने भएका छन् ।

नयाँ गठबन्धन बनेपछि कर्णाली प्रदेश एमालेका भागमा परेको थियो । त्यसपछि प्रधानमन्त्री तथा माओवादी केन्द्रका अध्यक्ष पुष्पकमल दाहाल प्रचण्डले मुख्यमन्त्री शर्मालाई राजीनामा दिन भनेका थिए । तर, शर्माले राजीनामा नदिने बरु प्रदेशसभामा विश्वासको मत लिने  अडान राखेका थिए ।

यसरी केन्द्रको निर्देशन मुख्यमन्त्री शर्माले नमानेपछि पछिल्ला तीन दिन कर्णालीको राजनीतिमा तरंग नै आएको थियो । तीन दिनयता एमाले र माओवादी केन्द्रका छुट्टाछुट्टै बैठकहरू मात्र बसेका थिएनन्, एमाले र माओवादी केन्द्रबीच पनि वार्ताहरू भएका थिए ।

प्रदेशसभामा दर्ता गरिएको विश्वासको मतको प्रस्तावलाई फिर्ता लिएर सभालाई सम्बोधन गरी मुख्यमन्त्री शर्माले राजीनामा दिने तयारी गरेको माओवादी सांसद दुर्गबहादुर रावतले बताएका छन् ।