हुम्ला – हुम्लाबाट काँग्रेसको तर्फबाट प्रतिनिधि सभा सदस्यका उम्मेदवार जयपति रोकायाले आफ्नो झण्डै तीन दशक लामो राजनीतिक संघर्षको मूल्यांकन गर्ने जिम्मा हुम्ली जनताको हातमा आएको बताउनुभएको छ।
एक अपील जारी गर्दै उहाँले हुम्लाको विकास र समृद्धिका लागि आफ्नो जीवनकै ऊर्जावान समय खर्चिएको स्मरण गर्नुभएको छ।
विगतको संघर्ष: सातु–सामलदेखि हिउँका रातिसम्म
आफ्नो राजनीतिक यात्राको सुरुवाती दिनहरू सम्झिँदै रोकायाले २० वर्षको ठिटो उमेरदेखि नै हुम्लाका विकट बस्तीहरूमा कांग्रेसको झण्डा बोकेर हिँडेको बताउनुभयो।
“त्यतिबेला न हिँड्ने बाटो थियो, न बस्ने ठाउँ। हप्तौंसम्म सातु र सामलको झोला बोकेर हिउँमा खाली खुट्टा हिँड्दा औंलाहरू नीला हुन्थे,” उहाँले भन्नुभयो, “तर हुम्ली जनताको आँखामा देखेको परिवर्तनको सपनाले मलाई कहिल्यै थाक्न दिएन।”
पञ्चायतकाल र द्वन्द्वको समयमा भोग्नुपरेका जोखिमहरूको चर्चा गर्दै उहाँले आफूलाई पद र पैसाको प्रलोभन देखाइएपनि आफ्नो निष्ठा र आदर्शबाट कहिल्यै विचलित नभएको दाबी गर्नुभयो।
‘सिटामोल र नुनको अभाव’ अन्त्य गर्ने संकल्प
उम्मेदवार रोकायाले हुम्लाको भौगोलिक विकटताका कारण यहाँका आमाहरूले सिटामोल नपाएर ज्यान गुमाउनुपर्ने र दाजुभाइले नुनका लागि हप्तौं हिँड्नुपर्ने कारुणिक अवस्थाले आफूलाई सधैं पिरोल्ने गरेको बताउनुभयो।
यही अभाव र पछौटेपनलाई जरैदेखि उखेल्न आफू राजनीतिमा होमिएको उहाँको भनाइ छ।
“मैले व्यक्तिगत स्वार्थ र परिवारको सुख कहिल्यै हेरिनँ। मेरा दौंतरीहरू सुविधासम्पन्न जीवन बाँचिरहँदा म भने ४७ वर्षको उमेरसम्म सधैं हुम्लाकै विकट गाउँका जनताको सुख-दुःखमा सँगै रोएँ र सँगै हाँसें।”
मुख्य एजेन्डा: राष्ट्रिय सडक सञ्जालमा हुम्ला
रोकायाले हुम्लाको दुःखको स्थायी समाधानका लागि ‘राष्ट्रिय सडक सञ्जाल’ सँग जिल्लालाई जोड्नु नै आफ्नो मुख्य संकल्प रहेको स्पष्ट पार्नुभएको छ।
आफू कुनै व्यक्तिगत लाभ वा पदका लागि नभई हुम्लाको भविष्य बदल्ने एउटा इमानदार ‘भुइँमान्छे’ को अनुभव लिएर जनताको दैलोमा आएको उहाँले उल्लेख गर्नुभयो।
एक मतको अपील
आफ्नो सिङ्गो राजनीतिक यात्राको मूल्यांकन गर्ने बेला आएको भन्दै रोकायाले यसपटक ‘रुख’ चिन्हमा मतदान गरी आफूलाई सेवा गर्ने अवसर दिन हुम्ली बासीसँग आग्रह गर्नुभएको छ।
“मैले त मेरो जीवन अर्पण गरें, अब हुम्ला बदल्ने पालो तपाईंको एक मतको!” उहाँले अपीलमा भन्नु भएको छ।
राराखबर । २०८२, ४ फाल्गुन सोमबार