जाजरकोट – नलगाड नगरपालिका वडा नं. ७, दल्लीका स्थानीय युवाहरूले खानेपानीको अभाव र अव्यवस्थित फोहोर व्यवस्थापनको समस्या समाधान गर्न माग गर्दै नगरपालिकाको ध्यानाकर्षण गराएका छन्।
त्रिवेणी युवा क्लबका तर्फबाट नगर प्रमुखलाई ध्यानाकर्षण पत्र बुझाउँदै उनीहरूले ६ बुँदे माग अघि सारेका हुन्।
लामो समयदेखि स्वच्छ खानेपानीको पहुँच नहुँदा स्थानीय बासिन्दाको दैनिक जीवन कष्टकर बनेको र उचित फोहोर व्यवस्थापन नहुँदा वातावरणीय प्रदूषण बढ्दै गएको क्लबले जनाएको छ।
मुख्य मागहरू:
- समानुपातिक वितरण: कालान्गरे र तुनेपौरौको खानेपानीलाई सबै टोल र बस्तीहरूमा पारदर्शी र व्यवस्थित तरिकाले वितरण गरिनुपर्ने।
- सार्वजनिक पहुँच: होटल र व्यक्तिगत घरमा जडान गरिएका निजी धाराहरू कटौती गरी १५ दिनभित्र सबैको पहुँच पुग्ने गरी सार्वजनिक स्थानमा धारा जडान गरिनुपर्ने।
- डम्पिङ साइटको निर्माण: फोहोर व्यवस्थापनका लागि उपयुक्त स्थानमा ‘डम्पिङ साइट’ निर्माण गरिनुपर्ने।
- नियमित फोहोर संकलन: फोहोर उठाउनका लागि ट्रयाक्टर वा टिपर जस्ता सवारी साधनको व्यवस्था गरी नियमित संकलन गरिनुपर्ने।
- जरिवानाको व्यवस्था: सार्वजनिक स्थलमा फोहोर फाल्नेलाई ५०० देखि ५,००० रुपैयाँसम्म जरिवाना गर्ने कानुनी व्यवस्था मिलाउनुपर्ने।
स्थानीय सरकार सञ्चालन भएको लामो समय भइसक्दा पनि बजार र सरकारी कार्यालयबाट निस्कने फोहोरको उचित व्यवस्थापन नहुँदा मानव स्वास्थ्यमा गम्भीर असर परिरहेको पत्रमा उल्लेख छ।
उक्त ध्यानाकर्षण पत्रमा त्रिवेणी युवा क्लबका अध्यक्ष धुर्व सिंह, उपाध्यक्ष नविन नाथ, सचिव भुपेन्द्र सुनार, कोषाध्यक्ष शोभा शाही र महासचिव शिशिर वि.क. लगायतको हस्ताक्षर रहेको छ। युवाहरूले यी मागहरू यथाशीघ्र कार्यान्वयन नभए थप कदम चाल्ने समेत संकेत गरेका छन्।
राराखबर । २०८३, ११ बैशाख शुक्रबार