सुर्खेत – फागुन २३ गतेको त्यो बिहान। जब सुर्खेतको वीरेन्द्रनगर–४ स्थित सहिद पार्क नजिकैको सामुदायिक वनमा एउटा कलिलो जीवन बेहोस अवस्थामा फेला पर्‍यो, कसैले सोचेको थिएन कि त्यो घटनाले पूरै प्रदेश राजधानीलाई स्तब्ध पार्नेछ। २३ वर्षीया इमिसा (इनिशा) विकको मृत शरीरसँगै एउटा परिवारको खुसी मात्रै मरेको छैन, समाजमा छोरीहरूको सुरक्षामाथि नै ठूलो प्रश्नचिह्न खडा भएको छ।

​सडकमा आक्रोश र आँसु

​बुधबार दिउँसो वीरेन्द्रनगरका सडकहरू शोकमग्न मात्र थिएनन्, आक्रोशित पनि देखिन्थे। मंगलगढी चोकबाट सुरु भएको ‘खबरदारी र्‍याली’ मा सहभागीहरूको हातमा रहेका प्लेकार्डले एउटै कुरा मागिरहेका थिए— “इनिशालाई न्याय देऊ!”

​पीडित परिवार, आफन्त र अधिकारकर्मीहरूको भीड यरीचोक र वीरेन्द्र चोक हुँदै जिल्ला प्रशासन कार्यालयतर्फ बढ्दा हावामा उनीहरूको नारा मात्र गुन्जिएको थिएन, एउटी छोरी गुमाएको पीडा पनि प्रस्टै झल्किन्थ्यो। “यो केवल र्‍याली मात्र होइन, न्याय नपाएसम्म जारी रहने खबरदारी हो,” मृतकका आफन्त चन्द्रबहादुर विकले भावुक हुँदै भने।

​ परदेशमा बुवाको विलाप

​एकातिर सुर्खेतको सडक न्यायको माग गर्दै तातेको छ, अर्कोतिर एउटा घर उजाडिएको छ। इमिसाका बुवा रोजगारीको सिलसिलामा दुबईमा छन्। छोरीको प्रगतिको सपना बुनेर मरुभूमिमा पसिना बगाइरहेका उनी अहिले त्यहीँ अलपत्र परेका छन्। यता आमाको आँसु रोकिएको छैन। विक्षिप्त अवस्थामा रहेकी आमालाई सान्त्वना दिने शब्द कसैसँग छैन।

​अनुसन्धानको घेरामा चार नाबालक

​प्रहरीले यो घटनामा संलग्न रहेको आरोपमा चार जनालाई नियन्त्रणमा लिएको छ।  पक्राउ परेका सबै १८ वर्षमुनिका नाबालक छन्। जिल्ला प्रहरी कार्यालय सुर्खेतका डीएसपी मोहनजंग बुढथापाका अनुसार घटनाको सूक्ष्म अनुसन्धान भइरहेको छ।

​यद्यपि, परिवारले दाबी गरेझैँ यो सामूहिक बलात्कार हो कि होइन भन्ने कुराको अन्तिम पुष्टि चिकित्सकीय रिपोर्ट आएपछि मात्र हुने प्रहरीको भनाइ छ।

​अधिकारकर्मीको चेतावनी

​अधिकारकर्मीहरूले यो घटनालाई सामान्य रूपमा नलिन चेतावनी दिएका छन्। उनीहरूले प्रशासनलाई ध्यानाकर्षण पत्र बुझाउँदै प्रहरी कार्यालय अगाडि धर्ना दिने कार्यक्रम तय गरेका छन्। जघन्य अपराध गर्नेहरू जोसुकै भए पनि उमेरको बहानामा उन्मुक्ति पाउनु नहुने र निष्पक्ष छानबिन हुनुपर्ने उनीहरूको अडान छ।