सुर्खेत- सुर्खेत निर्वाचन क्षेत्र नम्बर-१ बाट प्रतिनिधिसभा सदस्यमा निर्वाचित नेपाली कांग्रेसका उम्मेदवार बिष्णुबहादुर खड्काले आफ्नो जितलाई आम मतदाताको जितको रूपमा लिँदै सम्पूर्ण जनताप्रति हार्दिक आभार व्यक्त गरेका छन्।
विजयी भएलगत्तै आफ्नो सामाजिक सञ्जाल फेसबुकमार्फत सांसद खड्काले आफूलाई अमूल्य मत दिएर अनुमोदन गर्ने सुर्खेत-१ का सम्पूर्ण बुवा-आमा, दाजु-भाइ तथा दिदी-बहिनीहरूप्रति कृतज्ञता प्रकट गरेका हुन्।
उनले लोकतन्त्रमा हारजित एउटा विधि र प्रक्रिया भए पनि यो विधिसम्मत जितको सम्पूर्ण हकदार जनता नै भएको स्पष्ट पारेका छन्।
”निर्वाचनका बखत तपाईंहरूको बीचमा मत माग्दा मैले गरेका वचनबद्धता बमोजिम निष्ठा र इमानका साथ काम गर्दै जनताको बीचमा रहेर त्यो विश्वास पूरा गर्नेछु,” खड्काले भनेका छन, “आफ्नो अमूल्य मतदानद्वारा मलाई जितको ढोका खोलिदिएर तपाईंहरूले निरन्तर सेवा र विकासको बाटोमा हिँड्ने जुन मौका दिनुभएको छ, त्यसप्रति म अत्यन्तै आभारी छु, ऋणी छु।”
सांसद खड्काले आफूलाई विश्वास गरेर उम्मेदवारको रूपमा एकल नाम सिफारिस गर्ने नेपाली कांग्रेस सुर्खेत क्षेत्र नम्बर-१ कार्यसमिति र त्यही निर्णयलाई स्वीकार गरी उम्मेदवार बनाउने पार्टीको केन्द्रीय नेतृत्वलाई पनि विशेष धन्यवाद ज्ञापन गरेका छन्।
यसका साथै, उम्मेदवारी दर्ताको दिनदेखि मतदान र मतगणनाको सम्पूर्ण प्रक्रियासम्म अहोरात्र खटेर विजयको बिन्दुसम्म पुर्याउने पार्टीका सबै तहका नेता, भ्रातृ तथा शुभेच्छुक संस्थाका सदस्य र आम शुभचिन्तकहरूलाई उनले स्मरण गरेका छन्।
निर्वाचनलाई शान्तिपूर्ण र निष्पक्ष रूपमा सम्पन्न गर्न खटिने प्रमुख निर्वाचन अधिकृतलगायत सम्पूर्ण कर्मचारी, सुरक्षाकर्मी र सञ्चारकर्मीहरूलाई पनि उनले धन्यवाद दिएका छन्।
”हामी सबै मिलेर लोकतान्त्रिक पार्टीको लोकतान्त्रिक यात्रालाई अझ फराकिलो बनाउँदै समृद्ध मुलुक निर्माण गर्ने बाटोमा सँगसँगै क्रियाशील हुनेछौं,” खड्काले भनेका छन्।
आफ्नो कार्यकालमा ‘समृद्ध क्षेत्र नं. १ सुर्खेत, समुन्नत कर्णाली र लोकतान्त्रिक नेपाल निर्माण’को महायात्रामा सफलता मिल्ने विश्वास व्यक्त गर्दै उनले विकास र समृद्धिको यात्रामा सबैलाई सँगै हातेमालो गर्न आह्वान समेत गरेका छन्।
राराखबर । २०८२, २४ फाल्गुन आईतवार