सुर्खेत- नेपाली कांग्रेसका कार्यवाहक सभापति पूर्णबहादुर खड्काले प्रतिनिधिसभा निर्वाचनको परिणामले पार्टीका हरेक तहका नेता तथा कार्यकर्तालाई गम्भीर सन्देश दिएको बताउनुभएको छ।
मतदाताको निर्णयलाई शिरोधार्य गर्दै अबका दिनमा पार्टीभित्र निर्मम समीक्षा हुनुपर्नेमा उहाँले जोड दिनुभएको छ।
सामाजिक सञ्जालमार्फत आफ्नो धारणा सार्वजनिक गर्दै खड्काले भन्नुभयो, “हाम्रा भगवानरूपी मतदाताहरूको निर्णयबाट हामी सबै कांग्रेसीहरूलाई गम्भीर सन्देश प्राप्त भएको छ। अब आवेग, उत्तेजना र बदलाको भावनाबाट मुक्त भएर संयम र जिम्मेवार बन्नु पर्ने बेला आएको छ।”
- निर्मम समीक्षाको आवश्यकता: विगतका गल्ती र कमजोरीहरूको ‘म म’ भन्दै आत्मलोचना गर्न र वस्तुनिष्ठ समीक्षा गर्न उहाँले आग्रह गर्नुभएको छ।
- एकतामा जोड: व्यक्तिगत महत्वाकांक्षा र आग्रह-पूर्वाग्रह त्यागेर पार्टीको बृहत्तर एकताका लागि निष्ठा र समर्पणका साथ अघि बढ्नु सबैको नैतिक कर्तव्य भएको उहाँको तर्क छ।
- चुनौतीको सामना: पार्टीसामु अहिले ‘हिमालयन चुनौती’ खडा भएको उल्लेख गर्दै खड्काले एकता र संयमता नै ती चुनौती परास्त गर्ने एक मात्र बाटो भएको स्पष्ट पार्नुभयो।
कार्यवाहक सभापति खड्काले पार्टीका जिम्मेवार निकायमा रहेका व्यक्तिहरूलाई विशेष सजग रहन आग्रह गर्दै अबको बाटो एकता र सुदृढीकरणकै हुनुपर्नेमा विशेष जोड दिनुभएको छ।
राराखबर । २०८२, २६ फाल्गुन मंगलवार